霸嗎拉麵 (已結業)

自從呢間拉麵店開張之後無時無刻都見到門口好多人等位，一直都好好奇究竟呢到既拉麵係咪真係咁好食，今日就一於同朋友去試試佢啦！特盛炙燒豚肉拉麵身為食肉獸既我一見到呢個拉麵就諗都唔洗諗即刻叫啦。一黎到見到賣相果然係好吸引，上面足足有四塊大大既炙燒豚肉。炙燒豚肉非常厚身，脂肪分布比例好平均，咬落去肉質嫩滑鬆化，一啲都唔韌，炙燒過後入口充滿住油脂香。飲一啖豚骨湯底，味道濃郁杰身，飲得出係落足料去製而成，無半點味精味。拉麵幼身，質地柔軟適中，掛湯能力高；至於溏心蛋亦名乎其實半流心，整體算係唔錯。燒餃子一客燒餃子有五隻，皮薄煙韌，皮邊煎得好香脆。入面既餡有肉同菜，好夠肉汁好juicy。淋上照燒汁食，味道一流。佢既野飲選擇都好多，我想試呢枝綠茶可樂，今次終於有得試。果然飲落係有可樂味，不過就唔係好試到有綠茶味。另外佢有唔同既水果梳打可供選擇，味道好有水果既清甜，亦好夠氣泡，個人認為比綠茶可樂出色。