春陽茶事 (The LOHAS康城) (已結業)

第一次入將軍澳康城去搵朋友，響樓下閒逛商場果陣，居然無意間發掘咗一間幾值得推介嘅茶飲店。呢間位於3樓嘅茶飲店叫做「春陽茶事」，雖然舖位細細，但係勝在有質素。「甜杏桂花烏龍」係一款非常清新嘅飲品，清甜嘅桂花烏龍茶裡面，擺咗一啲杏仁凍落去，細嫩軟滑嘅口感，增加咗飲品嘅層次。「蜜桃烏龍」亦係另一款清爽之選，招牌嘅鹿谷烏龍茶配合蜜桃果醬，巧妙咁取得味道上面嘅平衡。下次入去將軍澳康城，一定要再飲多一次先得。