霸嗎拉麵 (已搬遷) 新店位置

味道一般。服務極差。店員甲：不嬲拉麵店都係一人一張單自己寫嘅，何況我朋友叫拉麵，我叫撈麵，根本唔係同一張紙。你做乜落單時要問我「係咪同一張單？」我明你可能係覺得我兩個人一齊嚟係可以記落同一張單，咁但係我唔係店員，正常係問我「係咪一齊？」囉，你係未瞓醒定個人根本無厘頭？然後我哋加單，已經寫好加單紙後舉手，你竟然從遠處隔住其他客人大聲問「加乜嘢？」仲要問兩次，間店唔大你行一步過嚟唔使死？係咪要變做茶餐廳？店員乙：你返工不停玩手機都算，上菜時目無表情，仲要是但放低碗麵喺我面前就想走，其實碗麵係我朋友嘅。店員丙：你漏單仲同我講，呃我話廚房唔小心整錯咗辣味，竟然仲想逼我改食辣嘅，然後我話我唔食得辣，你同我講「咁可能要再等兩三分鐘」。由頭到尾你連「對唔住」都無聲，我朋友碗麵都食咗八成你先嚟同我講，仲呃我係做錯辣味唔係漏單，仲逼我轉辣，兩三分鐘整到唔該你自己醒目整過唔好夾硬要客人轉去就你好無？又想變做茶餐廳？店員丁：你收銀時竟然一聲「201蚊吖！」仲攤大手板要錢。你識唔識咩叫「多謝」，同埋我而家欠咗你錢要攤大手板去拎？就算你完全唔理服務水準，啲嘢食質素其實大把拉麵店好過佢，我唔明做乜要嚟呢間排隊。