薈麵館

營業中

休息中

以前公司在合和，不過走左之後, 好少行合和，今日專登返黎同個舊同事聚舊。舊同事帶左我去7樓，試間新開粥麵店。間野裝修很整潔，地方好闊落，兩個人坐卡座，好舒服。舊同事食開，所以由佢發板，佢叫左 一飯一麵，兩個小食，一個點心。先到子薑皮蛋，雖然皮蛋有啲乾，不過用一塊子薑夾件皮蛋點糖，味道當堂唔同曬 ，好食好多。再來係白灼薑蔥鯇魚皮，舊同事極推介，晶瑩半透嘅魚皮，撈了些紅椒同醬油，爽滑魚皮有嚼勁，果然係好介紹。舊同事幫我叫左碟海南文昌雞，賣相真係唔錯，文昌雞皮比較白色，不太肥，紅椒黑木耳伴碟，隻雞肉不算厚， 但雞味幾濃，不點醬汁都夠味。不過油飯我覺得唔夠熱，同埋比較硬。最驚喜係食晚飯，竟然仲有點心食，呢度嘅蝦餃，咬開可以見到三隻蝦，澄粉做嘅外皮晶瑩，蝦仁彈牙，超正。舊同事自己食叉燒薑葱撈麵 ，我試左啖麵 ，真係可能隔離飯香，我覺得佢啲麵加左少少蔥花，食落好香，厚切叉燒食落口感好好。聚舊又有好野食，超滿足的一晚。