西門町台灣麵食 (已結業)

上Openrice 見到咁多好評，又想食台灣菜，咁就決心試下。同男朋友係門口等左15分鐘到，就可以入去了，不過入面都好full，唔知係唔係太好食所以吸引咁多人呢？我地叫左個2人餐，可以選三個小菜，加一個細飯或細麵，仲有野飲，甜品，都係$178。小菜︰醉雞，腐皮蚵卷，涼伴茄子，然後要一個擔擔麵，魯肉飯，飲朱古力奶茶同藍莓綠茶。醉雞一到，成張枱都有香噴噴的酒味，整碟是凍的，而且肉質好硬，明顯係冰鮮雞，味道幾好。腐皮蚵卷，好脆，食落好又熱好多冬菇味，正。涼伴茄子，個汁酸酸甜甜，食落去好開胃，茄子吸收哂d汁，正。之後到擔擔麵，好濃的花生醬味，因為我對花生醬敏感，我無食，但我男朋友話好好食，少少辣。咁我就食魯肉飯，肉臊都好入味，一口飯一口肉臊，正，而且細細碗，份量剛剛好。朱古力奶荼有濃濃的朱古力味，加埋奶茶好夾。藍莓綠茶的藍莓味好重，味道都好清新。甜品，黑芝麻糯米磁，上面加左少少黑芝麻，食落去黑芝麻係口入面漏出泥，正。整體上，菜式好精美，味道好正，期待下一次再試其他菜式。