阿木台灣麵 (廣華街) (已結業)

太座話要去家樂坊買衫，一家三口都好耐冇去嗰邊，唔揸車由石門坐鐵路出去都好快又方便!出到去都十人十睇吓有咩食，發現到呢間台灣麵呢個鐘數仲係咁多人，於是入去試吓有咩咁好食，坐低唔知食乜，睇餐牌見到標示“好吃”之類照點唔會點錯，一定係招牌食品!食台灣麵當然首選係食牛肉麵，個人較喜歡食牛筋，叫咗紅燒牛肉牛筋麵，牛肉夠淋有肉味，牛筋一定唔可以硬，呢度夠軟身有食骨膠原嘅感覺；湯底濃度適中，唔會飲完覺得口渴；家傳鹽酥肉便當，夠膽叫家傳果然名不虛傳，條狀外形以為古怪，食一啖就知從來未食過咁好食嘅鹽酥肉，加上適嘅量肉燥飯，吃清光!炸花枝丸已經好味但都唔夠台式炸大腸咁驚喜，慶幸之前冇喺隔離街食街邊炸大腸，呢度皮脆肉滑，唔會過鹹，廚師好嘢!太座飲芝士岩鹽奶蓋青春茶，佢話更勝出面嘅茶舖，我揀咗金鑽鳳梨紅茶，每飲一啖都有細細粒嘅菠蘿，又唔太甜，所以我建議大家唔使點少甜；值得一提係呢度嗰隻自家制麻辣醬，對於唔嗜辣嘅我都覺好香口，難怪嗜辣嘅太座係咁加，最後仲買咗一樽返屋企!我見到餐牌仲有好多款食品都好吸引，好似炸甜不辣、芝士肉鬆蛋餅唔係度度有，下次一定叫嚟食!期待!