圓山台灣料理 (已結業)

畢業之後各有各工作，不過朋友係要見㗎嘛，所以今日約左係圓山台灣料理食晚飯。餐廳名字感覺係普通台灣餐廳，點知一入去發現係茶樓式經營，裝潢俾人感覺金碧輝煌，大家都坐得舒服。係云云套餐之中，自選八道風味菜最吸引我，每道菜平均唔駛$100，食物選擇亦多。干煸四季豆炒得乾爽唔算太油膩，而且有適量肉碎，肉味香濃。蚵仔煎比較似煎蛋，亦唔係配有酸甜醬汁嗰種。蛋味幾香，酥脆但失去香滑口感。 平時食滷肉飯嘅滷肉都係細細粒，今次係第一次食咁大件嘅滷肉，肉質唔鞋，味道鹹中帶甜，入曬味。三杯雞上曬色，惹味同時唔會太油。另外醬汁香濃，送飯一流。蛋黃肉成坐山咁高，味道比一般肉餅更甜，有少少咬口。咕嚕黑豚肉比一般咕嚕肉更加嫩滑，醬汁酸度剛剛好。溫室南瓜炒鮮飽要加$180升級先有。南瓜同鮑魚比例算合理，鮑魚幾大隻肉質彈牙，南瓜稍為煎過所以幾香口。另外仲叫咗碟台灣炒新竹米粉，分量大之外，米粉稍為濕潤唔會太乾，配菜係菇、雞肉等等，簡單就是美。最後食埋小倉紅豆椰汁糕就結束今次晚餐。自己感覺圓山台灣料理不只售賣台式食物，更包含中國菜嘅元素。性價比都高，非常適合多人聚餐。