8鍋臭臭鍋 (謝斐道) (已結業)

秋風起又係食火鍋嘅時候！今日特別去銅鑼灣試一間一直都好想試嘅台式火鍋店⋯8鍋臭臭鍋！其實一個人打邊爐野有乜好怕喎！火鍋店距離銅鑼灣地鐵站好近，大概5分鐘嘅路程就到啦！店舖環境寬敞，空間感十足！特別係枱嘅設計，一啲都唔迫，舒適度滿分！坐低後翻開餐牌，火鍋店以一人火鍋做主打！細心思量過之後，決定揀蕃茄白豚鍋！另外仲叫咗一個鴨血小食！等左一陣間，鴨血先到！其實鴨血嘅口感同豬紅係差唔多，但鴨血就稍為有口感一D，而且係用麻辣配方炮製，非常惹味！枱嘅側邊亦都放滿左醬料比客人自行調配！食完小食之後火鍋都到啦！鍋物嘅配料份量十足，濃濃嘅蕃茄香令我胃口大開！蕃茄湯底嘅配料以田園蔬菜為主，除咗有雲耳之外一仲有大量嘅蔬菜、粟米、冬菇、豆腐等等⋯豆腐浸滿番茄湯，非常多汁入味!仲有半肥瘦嘅白豚肉，肉質鬆軟，喜歡！跟餐除咗附送白飯之外，其實鍋入面都會有啲粉絲，所以呢個鍋物一定飽肚呢！話明係台式火鍋店，當然要嗌杯珍珠奶茶先似樣！除咗珍珠奶茶外，仲嗌多左杯烏龍茶解解渴添！