維港灣餃子坊 (已結業)

喺教育路嘅呢一間維港灣餃子坊都開咗好幾個月，一直好想嚟試吓，適逢今日唔想食永年，就行過佢對面試吓呢間餃子店。日本UCC無糖咖啡，餃子店嘅飲品通常都係豆漿汽水菊花茶，但係維港灣竟然有咖啡飲，仲要係日本UCC嗰隻，胖侶見到即刻心心眼。招牌三併餃酸辣湯米線，招牌三併餃分別係大白菜餃、韮菜餃同埋香芹餃，餃子粒粒肥大肉厚，相當足料，菜肉大約三七比例，童叟無欺，大白菜餃口感爽脆，韮菜餃韮味香濃，明顯係要夠新鮮先至做到呢個效果；酸辣湯味道平衡，唯一可以挑剔嘅係米線有啲腍，如果爽身啲應該會更好。三重芝士煎餃，呢個芝士煎餃嘅賣相相當吸引，咬開裏面係滿滿嘅豬肉，面頭仲有海量嘅芝士同埋蟹籽，充滿住日式嘅風味，呢三重芝士分別係由 parmesan、mozzarella 同 cheddar 三種芝士所組成，認真"芝"味滿足。