影片
更多
2011-01-21
675 瀏覽
有朋自遠方來，話想食上海菜，所以就帶左佢地去間佢地聽都未聽過既寧波同鄉會，食Ｄ喺外國食唔倒既正宗寧波風味。雖然寧波會係私人會所，不過未係會員既朋友唔洗驚，因為唔需要任何人介紹，只要填張好簡短既表格，同埋交$100年費就可以立刻成為會員，即時就有張臨時會員卡，效率好高。如果同桌已有會員，嗰$100可以入埋會員張單到添。環境衛生：酒樓式裝修，好簡單，絕對冇多餘既擺設或花巧既設計，非常符合經濟原則。地方打理得乾淨企理：雖然談不上潔亮如新，不過一定唔會見到一dat dat既舊污積，穿左隆既枱布同餐巾，或者係崩左既碗筷。小弟幫襯嗰晚大廳好爆好逼人，枱同枱中間唔係好多位，尤其係大枱附近，可以話係動彈不得；睇得出佢想用盡所有實用面積黎做生意。個人覺得最大嗰張枱頂哂籠只可以坐十二個人。隔暗設備可以話係零，所以除非好少人幫襯，唔係真係好嘈。個會其實係有間＂會長房＂既：如果擺一席（最多十四人），最低消費為 $6,000；如果擺兩席，最低消費為每席 $4,500。接電話嗰位姐姐仔好細心咁解釋話客人可以訂嗰間房，不過因為係＂會長房＂，所以就算訂左房，如果當日會長突然有要求，客人係要讓返間房出黎比會長既，而工作
雖然寧波會係私人會所，不過未係會員既朋友唔洗驚，因為唔需要任何人介紹，只要填張好簡短既表格，同埋交$100年費就可以立刻成為會員，即時就有張臨時會員卡，效率好高。如果同桌已有會員，嗰$100可以入埋會員張單到添。
環境衛生：
酒樓式裝修，好簡單，絕對冇多餘既擺設或花巧既設計，非常符合經濟原則。地方打理得乾淨企理：雖然談不上潔亮如新，不過一定唔會見到一dat dat既舊污積，穿左隆既枱布同餐巾，或者係崩左既碗筷。
小弟幫襯嗰晚大廳好爆好逼人，枱同枱中間唔係好多位，尤其係大枱附近，可以話係動彈不得；睇得出佢想用盡所有實用面積黎做生意。個人覺得最大嗰張枱頂哂籠只可以坐十二個人。隔暗設備可以話係零，所以除非好少人幫襯，唔係真係好嘈。
個會其實係有間＂會長房＂既：如果擺一席（最多十四人），最低消費為 $6,000；如果擺兩席，最低消費為每席 $4,500。接電話嗰位姐姐仔好細心咁解釋話客人可以訂嗰間房，不過因為係＂會長房＂，所以就算訂左房，如果當日會長突然有要求，客人係要讓返間房出黎比會長既，而工作人員就會喺大廳到用屏風間返間房比訂左房既客人用。請留意，寧波會有好多會長架，而且屏風間既房都有最低消費。
服務：
全場最落力既係一位哥哥仔：如果冇記錯，佢個名應該叫阿Ken；雖然佢冇著西裝，不過爸爸話佢一定係經理；佢做野真係效率高，反應快；落單，開酒，攞雪桶，分餸，可以一手包辦。相比起上黎，其他姐姐仔就好似豬油膏咁，好多時重唔明我地講乜，要等阿 Ken 處理返（服務分說明：阿Ken攞滿分，其他人就負一分）。
味道：
碟上並無多餘既汁液或油積，證明佢每道餸都有抺過碟先攞出黎，非常之睇得及得體。
清炒蝦仁：$160；選取好細隻既河蝦炒製，鮮甜爽口，好食過出面用中蝦或大蝦做既多多聲；最感動係佢唔油膩，冇落醋都唔會覺得溜；健康推介一。
醉鴿：$95；酒味香醇濃郁；鴿肉唔肥，不過就有少少嚡，唔夠嫩。唔知醉雞個肉質會唔會好Ｄ呢？
鴨舌：$95；好少食倒咁軟熟滑溜同咁夠熱既鴨舌；如果唔係因為味道有少少咸，一定會在推介之列。
砂鍋雲吞雞：$300/隻；個湯好夠火候，好有雞味；雞肉唔算嚡，不過可以再煮腍Ｄ；湯入面既紹菜就夠哂腍啦，而且好甜；雲吞個皮夠薄，唯一怪怪地既係個餡全部係豬肉，雖然肥瘦均勻，不過就好似食緊豬肉丸多過食緊雲吞囉。
清炒鱔餬：$90；為安全起見，大家落單時一定要講明＂清炒＂鱔餬，要求古式煮法，即最後一刻先好落生蒜，＂贊＂熟油。依道餸簡直係頂瓜瓜，帶過咁多人黎食，個個都讚不絕口！首先，上枱既時候夠哂滾熱辣；鱔肉本身鮮甜無比，肉質幼嫩彈牙；炒功亦非常了得，做得好香口，而且唔會好似其他餐廳咁炒到杰 tat tat 或者一pat pat。成碟鱔真係一條骨都揾唔倒架！如果真係要雞蛋裡挑骨頭，身為蒜皇既我覺得生蒜份量可以再加碼。不過講真一句，寧波會既鱔餬係我喺香港食過之中最正既。古式推介二。
炸臭豆腐：$60 / 六塊；寧波會既招牌菜之一，臭味離遠未上枱已經聞倒，上埋枱你嗰日唔想洗頭都唔得。炸得好鬆化，皮脆心軟，不過大家要小心個心熱呀。招牌推介三。
紅燒元蹄：$180；喺轉盤上轉左個圏比大家睇完，阿Ken就自動攞把刀黎幫我地切，Ｄ煙同香味重係肉身慢慢升上黎，好high呀。元蹄一Ｄ都唔肥，皮靚肉嫩，精彩到連Ｄ骨都識自動剝落黎，小弟不禁拍手叫絕。精彩推介四。
白肉片：$70；唔需要特別講明，個汁都會分開上。雖然個賣相好似唔係好得，不過意外地好好食，因為白肉切得夠薄，而且咬落一Ｄ都唔嚡。意外推介五。
雞火乾絲：$80；雞絲火腿絲夠幼；唔咸得黎重要甜甜地，幾得意。
炸銀絲卷：$12/條；熱辣辣，新鮮炸出黎，未轉完一個圏已經冇哂，要encore既一味。個皮炸得好脆，但係個包入面就好軟熟。雖然包本身已經係甜甜地，不過加埋煉奶真係冇得彈，老豆果然冇介紹錯。Encore推介六。
小籠包：$40/半打；個餡同雲吞個餡好似一樣咁，都係肥瘦均勻既豬肉。個皮夠薄，不過就唔係好夠汁，所以唔係話特別欣賞。
生煎鍋貼：$40/半打；又係同一個肥瘦均勻既豬肉餡；個皮雖然厚，不過鍋貼係三款之中做得最好食既，因為佢煎得夠乾身得黎，個湯汁重可以保留喺入面，好啱我口味。餃類推介七。
後記：1) 當日打電話黎訂位時，原本想訂埋幾個大餸，點知接線生話除左拆骨魚頭煲要最少一日前訂，其他餸菜都唔洗訂既。食唔倒寧波會招牌之一既拆骨魚頭煲（每份$500），家人友人都有少少失望。
2) 不論大枝或細支，紅酒定烈酒，所有酒既開瓶費都係$30一枝，好低。
3) 地點好就腳：巴士，地鐡，的士，小巴乜都到；食完飯重可以行上去老蘭飲返杯添。
張貼
