牛精皇 (已結業)

今晚約左舊同事食飯，涼涼地大家都想打邊爐，就落左九龍城揾食。記得之前去過牛精皇幾好味，一於wall in睇下仲有無位先。早黎好彩仲有位，我地兩個都懶諗食咩，所以一睇餐牌有"優惠2人餐"就即刻order. 呢個餐有牛卷，半隻雞，即炸響鈴，菜同烏冬等等。雖然呢度有好多款特別湯底，不過驚食唔晒所以要左簡單既沙爹鍋。沙爹味夠濃夠香，而且夠晒味，所以野食唔洗再點豉油。呢度主打牛肉，當然食左肥牛卷先，件件都肥瘦平均，唔會太薄。咬落彈牙軟熟，肉味濃郁。仲有半隻雞，舊舊都有肉，唔會剩係比d骨頭當半隻。因為雞要淥耐d, 所以由得佢慢慢滾。淥左一輪先記得食，起初仲驚淥到老晒，但入口肉質仍保持嫩滑，一d都唔鞋，新鮮雞先可以咁好味。呢度仲有最讚既即炸響鈴，因為即炸可以點甜酸汁就咁食，口感脆似炸雲吞，有d蛋香味。原始d淥3秒再食，索晒d湯又係另一個風味。手打烏冬又係淥完仲好彈牙煙韌, 平時響日式鋪食果d都無咁彈，撈埋d沙爹湯食仲正。跟餐仲有滑豆付同蔬菜籃，食咁多肉類點都要D蔬菜清下腸胃.  食完2人餐已經夠晒飽。