柚屋係以柚子做主題嘅一間Café，相信都應該係全港第一間。柚屋由主菜到甜品都係柚子，爽！
🍴柚子味噌胡椒雞扒拉麵
拉麵湯底本身可以選擇要柚子醬油或者柚子味噌湯底，不過小編去到當日淨係得返一款柚子味噌湯底😔
首先拉麵嘅湯底入口就比較重味噌味，柚子味就比較淡，而且湯底入口有少少微辣，感覺上好似落咗啲七味粉落去調味咁。依個拉麵本身就軟硬度適中，拉麵亦都非常掛湯。柚子胡椒烤雞扒方面，肉質非常嫩滑，而且入口亦都非常juicy，雞扒亦帶有淡淡嘅柚子味，的確係好surprise。
🍴柚子檸檬伯爵迷你戚風
臨別前席店舖就推出左呢一個限定嘅戚風蛋糕。戚風蛋糕大約有4吋左右，蛋糕可供1-2人食用。
戚風蛋糕上面既裝飾雖然就唔算得上好特別，不過影相出嚟發現原來都幾靚下！戚風蛋糕入口口感鬆軟，帶有少少濕潤。蛋糕食落真係有好香嘅伯爵茶味，而且蛋糕裏面夾雜着好多伯爵茶茶葉碎喺裏面，而蛋糕上既伯爵茶味道就比較清幽。另外配埋蛋糕表面嘅柚子蜜一齊食，令到個蛋糕整體好清新。雖然蛋糕嘅表面加左啲柚子蜜，但整體來講味道亦都唔會話太甜。而個檸檬味就真係爭咗少少，唔多食得出。不過整體來講蛋糕嘅味道確實唔錯，而且有好重嘅伯爵茶味亦係驚喜位之一。
🍴柚子霜蜜
聽個名係咪R爆頭完全諗唔到係咩呢？其實呢杯係一杯柚子梳打加柚子雪糕製成嘅飲品。
柚子梳打本身嘅柚子味有啲淡，而且個梳打亦都唔係好夠氣，不過就勝在可以飲到有柚子味既清新得尼又唔會太甜。配埋個雪糕一齊暨可以令個柚子味更香，又可以令飲品既柚子味唔會減淡。不過雪糕既口感就更加似係雪葩，但估唔到雪糕裏面竟然會有一粒粒嘅柚子皮係到。
