點點心

營業中

休息中

黎到佐敦唔知道點解周圍嘅景物已經快速發展。但係快速發展嘅城鎮往往會有啲未嚟得切清拆嘅舊店。今日就去咗飲茶。舖頭入面環境唔錯，周圍有落地玻璃可以睇住舖頭出面嘅行人同景物。星期日嘅晏晝三點到四點舖頭已經冇乜客人。所以空位有好多。茶錢好似每個$4，第一碟餸就係涼拌雞絲。上面雖然剩係得一隻辣椒作為裝飾，但事實上呢一道菜入面有好多辣椒籽。溝埋一齊一次過食幾啖，其實都幾重口味。作為涼拌菜呢一味確實係出色，令我印象好深刻。雞絲係凍嘅但係完全冇嗰浸騷味，木耳可能喺辣椒水入面浸過我覺得好入味。香煎蘿蔔糕比較煙靭，唔係鬆散嘅一種糕點。份量算係幾充足，因為我係咁食到肉。呢碟蘿蔔糕我覺得係唔需要用辣椒醬或者豆瓣醬去做點綴。因為佢本身已經有足夠嘅鹹味。壽包有兩個真係唔係講笑，勁大隻。入面熱辣辣，可以睇得出佢係一出蒸籠，已經擺咗上枱。潮州粉果係好黐立立，如果把口夠大嘅話建議係成舊潮州粉果一下子食落去。因為一咬落去入面啲料就會散開，但係又會連住潮州粉果嘅粉皮。認真壽包同埋粉果都係大件夾抵食。最後一樣我覺得好應該評論嘅就係呢個蝦腸同埋黑松露腸粉。蝦腸就不過不失啦每一條腸粉入面都有一粒蝦肉喺度。淋上少少豉油就可以食啦。