疊囍居

營業中

休息中

星期六和家人去飲茶，中午時分酒樓只坐到大概七成客人。可能當日紅雨，少人出街。用點心紙點點心比用app好。望住張點心紙有問題，舉手問部長，點知部長一手搶去張點心紙就走。我哋叫住佢佢先返轉頭，用敷衍嘅態度回答我哋嘅問題。好啦，點心到啦。碟雪山叉燒包入面個餡係凍嘅，三粒叉燒包食淨一粒。碟例牌叉燒重差，師傅俾咗有筋嘅部位，完全咬唔開。同部長投訴佢換過一碟俾我哋，但一半都係肥嘅，食剩半碟。其他蝦餃燒賣點心味道正常。食完埋單，兩位小朋友計一位大人茶錢。問部長小朋友都要計茶錢？部長話係。再問部長住戶有冇折？佢竟然話係母親節前夕所以冇折。消費當日5月4日，母親節係5月12日，不如你話全個五月都冇折啦。最難受嘅係部長鬧櫃檯收銀姐姐，污言穢語鬧足5分鐘。我哋呢台有小朋友喺度佢都唔識得收口。其他客人都望住呢位部長鬧人。兩個月前第一次幫襯呢間酒樓，味道服務都不錯。估唔到事隔兩個月後再去，點心味道大退步，服務好差。我哋六個大人兩個小朋友食咗七百幾蚊，性價比超低，唉，唔好怪香港人唔係香港消費了。