咖啡灣 (荃灣千色匯) (已結業)

今日放假，又係同阿囡一齊去覓食嘅好日子。 上網見到啲人介紹呢間裝修好得意，同啲嘢都幾好食，就一於嚟試下啦~

佢門口佢就喺千色匯中間條巷，阿囡一見到門口就已經話好靚喇，有好多個粉紅色嘅咖啡杯係到，好吸引呀~

門口仲有隻天鵝，影相一流~

入到去我哋被安排坐喺卡位，卡位嘅佈置都好雅緻， 旁邊仲放左個玩具裝飾櫃，有成個lego砌嘅摩天輪裝飾，好別緻~

午餐由HK$76 起，包一杯野飲~

另外主餐牌都好多野揀，花多眼亂，樣樣都想揀添~

甜品餐牌仲吸引，我地諗左好耐，款款都好靚，真係要黎多幾次先得~

我地最後揀左兩款意粉， 一個飯，同一個甜品~ 開心share~

軟殼蟹黑松露忌廉意大利麵 - 軟殼蟹原隻上，成隻碟咁大隻呀~ 上枱時熱辣辣，切開兩邊時仲有煙出。成隻軟殼蟹都炸得好香脆，唔油膩~ 意粉好香松露味，有落足料， 正！

軟殼蟹黑松露忌廉意大利麵

切開兩邊時你睇下仲有滿滿黃色的蟹膏~

香辣蒜香蜆肉意大利麵 - 呢個岩晒啲喜歡辣辣地既朋友，蒜香味好濃，好襯個蜆肉。蜆肉都幾大粒同幾新鮮，食落鮮甜，唔會有沙~

香辣蒜香蜆肉意大利麵

豬扒墨魚汁飯配明太子忌廉汁 - 上枱構圖好靚，豬扒表面炸得好脆，內裡仲juicy, 唔會太un。 旁邊有得櫻花蝦，配埋個明太子忌廉汁，撈落墨魚飯度，配合得岩岩好，好鮮味~

豬扒墨魚汁飯配明太子忌廉汁

食完主菜就到阿囡期待既甜品喇~

黑魔王曲奇雪糕窩夫 - 裡要包括有大塊細既oreo 餅，曲奇雪糕，朱古力百力支。上枱時小朋友們已經嘩嘩聲，個樣已經贏晒。食落個窩夫幾鬆軟，我地4個人食好快就搶晒黎食喇~

黑魔王曲奇雪糕窩夫

餐飲熱柚子蜜，熱熱地甜甜地暖下個胃，唔錯~

服務方面，侍應姐姐見我地有小朋友，仲主動幫小朋友坐好BB 櫈，扣好安全帶，值得一讚！