峇里堂

營業中

休息中

呢間餐廳都真係開咗好耐，有成40幾年歷史，真係算得上係老字號。自己細個喺呢一頭返學，都係食開佢嘅。呢度價錢親民，搬咗舖之後裝修亦都新淨咗，所以坐得都舒服咗，成個用餐體驗都真係有提升到。當然啦，食物味道都保持到水準。 主要係食印尼jawa菜，呢個地方本身係盛產棕櫚糖嘅地區，所以食物甜度都會相對比較明顯，但係都因應客人嘅要求可以調整辣度去調整整體味道。峇里醬炒四季豆我都估到我會好鍾意，因為我本身好鍾意食四季豆，呢度都炒得好清脆，亦都係甜甜地，覺得好好味！蝦醬炒通菜就比較係一般香港人會食慣嘅口味，蝦醬鹹香味好夠，但係唔會過油，都好好食。今日始終唔係咁肚餓，所以就叫咗一個印尼陰功牛尾湯，牛肉份量都幾多，個湯有啲似泰式嘅冬陰功，酸酸辣辣，都幾開胃，牛尾都絕對唔會話鞋！有齊洋蔥、紅蘿蔔同埋芹菜，呢個湯底一睇就已經知係golden trio，真係喔最愛嘅combo，加埋嗰種剛剛好嘅酸度，真係覺得以後都會想每個星期食一次。加埋呢度其實都有好多小心思嘅位置，我最鍾意就係自助飲水機位，有埋兒童餐具，真係好貼心。