祥仔辣辣 (海運大廈) (已結業)

媽咪一直都想試下依間餐廳，所以趁母親節book咗位慶祝。因為節日關係，當晚只提供set dinner，唔可以散叫，依樣餐廳預先同咗我哋講，我哋逐様價錢大概加起黎同set dinner差唔多錢，所以覺得ok照幫襯。當晚我哋食六點，唔夠七半就離開，其實佢冇時限的，但上菜速度同趕住一晚做幾round嘅酒樓拍得住，一次過上哂所有頭盤同主菜，未食完又問我哋上得甜品未，所以我哋完全冇mood慢慢食，更何況佢入座率得1-2成，完全唔知佢急咩食物方面質素都幾差，除咗頭盤正常，主菜得個鹹字，就連招牌酸菜魚都令人好失望，唔夠酸菜之餘湯都冇鮮味。甜品方面，因為我唔係為食甜品而幫襯，所以冇咩期望，但佢粒湯圓真係好難食，皮又厚又唔滑。最後講埋服務態度，明明成晚得set dinner叫，而waiter覆單嗰陣係啱的，但都可以入錯機......得幾枱客、幾味餸都會出錯，好難想像full house會點。總括而言，除咗個seaview唔錯，成晩個體驗都好差。依個價位，有更好嘅選擇。