東泰茶餐廳

營業中

休息中

如果大家熟識北角，七姊妹道係茶餐廳的必爭之地，只係近健威坊一帶已經可以有4-5間茶餐廳。今次要介紹係OT界的飯堂東泰茶餐廳，門面望落絕對係唔討好，但佢最令人討好的地方係幾夜佢都仲開緊。有時我OT到12點諗緊食下野平衡心理之際，周圍都已經黑暗，只有東泰仲係燈火通明，的確係令人霎時感動。講番食物，其實質素絕對唔差，只少對得起個價錢。其中推介東泰的蒸肉餅，呢度的蒸肉餅係即叫即蒸，所以比其他快餐小菜都會耐D。另外味道唔會過鹹，加埋豉油同鹹蛋黃岩岩好。最緊要係肉質，肥肉同瘦肉比例合適，所以食落去夠滑唔鞋，仲要無雪味，又唔會落太多肥羔，所以係呢度其中一道出色的菜式。最後呢度係包湯同飲品，湯首推西湯羅宋湯，足料無味道，而凍飲大大杯，晚餐都係60至70水位，可以話係北角宵夜界飯堂首選之一。