麥記美食

鋪面唔大，六張枱加個開放式廚房，撞正晚市要同人搭枱，但聞住煎鍋貼嘅香氣都抵。
紅油抄手 ($58)
一碗堆滿十隻雲吞，皮薄到透粉紅肉色。肉餡細粒咗啲，但鋪面啲肉碎蔥花多到瀉，撈勻辣油同花椒粉，麻香過癮又唔燒喉。抵讚係辣油自家熬，食完唔會口乾。
鍋貼 ($42/5隻)
即叫即煎！咬落「咔」一聲，脆底薄過薯片。肉餡手剁有咬口，肥瘦三七比，啖啖豬肉香。跟碟浙醋浸住薑絲，點少少即刻提鮮，米芝蓮個貼紙無呃人。
小籠包 ($68)
籠蓋一揭，四隻飽滿到搖下搖下。夾起唔穿皮已贏一半，咬開小孔啜湯，熱燙雞湯混豬油香湧出。肉球實淨得嚟鬆化，墊底塊蘿蔔片吸咗油好細心。
兩個人食到飽飽埋單$168，以米芝蓮名銜算貼地。見老師傅即場桿小籠包皮，下次晏晝要試佢碗蔥油拌麵，隔籬枱話啲蔥炸到金黃好鬼香。