盤浦

一推開門，就俾嗰陣熱辣辣嘅韓風撲面襲擊！全場鮮黃色主調配工業風鋼管，K-Pop音樂轟住播，仲有韓籍店長用韓文打招呼，隔離枱仲坐住幾位韓國Oppa，堅係正宗韓式食店。

1

餐廳而家做緊優惠，真心抵食，好似$108嘅醬醃牛肋條、$99嘅醬醃牛五花肉同$108嘅腌制豬肋骨都已經好吸引，但講到性價比之王，就一定係每位$108嘅五花肉放題無限任食！仲有貼心到極嘅服務，店員會主動幫手睇火候，仲教埋點樣燒到金黄脆邊唔燶底，手勢仲專業過自己動手！

4

五花肉放題 $108/位
「每枱必點」呢四個字絕對無誇張！90分鐘無限encore嘅厚切豬腩肉，油花同肉層層相間，放上鐵板即刻「滋滋滋」狂響，燒到邊緣焦脆、中間保留肉汁嘅時候最正！夾片生菜（加$38有成盤）包住，再加瓣蒜同韓式大醬，油香同清爽感一齊爆發，呢個價錢仲要任食，真係大胃王之選！

醬醃牛肋條 $108
牛肋條醃到深啡色，醬油同果香甜味滲透每條纖維。店員幫手燒到表面微焦，咬落去肉質彈牙得嚟又唔韌，唔使點醬已經夠惹味。雖然牛味唔算濃厚，但醃料同油脂平衡得啱啱好，食多兩件都唔會膩口。

火山蒸蛋 $108
一上枱真係會「嘩」出聲！脹卜卜嘅蒸蛋好似活火山噴緊煙，入面藏住蝦肉同扇貝粒。蛋身充滿氣孔，食落比普通茶碗蒸多份蓬鬆感，仲帶啖啖海水鮮甜。不過記得相機食先！因為離火之後佢真係會慢慢「塌陷」㗎。