民華餐廳

營業中

休息中

六點左右閒逛至旺角街頭，無咩事做當然就要開始覓食。同行人大力推薦民華餐廳嘅蕃茄湯，無咩想食嘅我一於試下到底有幾好味。常餐：烘烤牛油多士、香腸、炒蛋由於我好鍾意烘烤過嘅多士，見到當然要點啦～仲要唔使加兩蚊烘底，非常好。多士烘得香脆，唔會太硬。配以薄薄一層牛油，更添牛油香，但唔會太有罪惡感。香腸應該係廚師腸，無咩特別，純粹懷舊下。炒蛋頗滑，都食到蛋香味。常餐：蕃茄叉燒通粉蕃茄湯底較一般餐廳濃稠，酸酸甜甜。個人而言比較欣賞叉燒，因為真係幾香，唔似普通連鎖快餐店嘅頹叉燒。肉質唔乾，又唔會太肥，揀得幾靚。小食：西多士簡單一碟西多士，但食完一塊就令人好有滿足感。即使食完明知好高熱量，都忍唔住繼續食。厚多士上碟時已斬開九小件，夾層應該有搽少少牛油，面層則有煉奶及牛油，邪惡程度與美味程度成正比。多士炸至金黃脆口，咬落綿香，煉奶及牛油充分滲入多士。重點係20蚊就食到，真心覺得抵食。點心：雞扎雞扎相對地普通，不過不失。算幾大件，雞肉滑嫩，芋頭份量都不吝嗇。總括而言，呢間嘅叉燒同西多士真係值得一試，價錢唔貴都係我回頭原因之一。