蘇媽.蘇媽馬來西亞茶餐室 (已結業)

今日約咗舊同事敘舊，大家都想食啲特別嘅菜式所以想試吓食馬來西亞菜，每次經過加連威老道都好多人排隊今日見到冇乜人等位就入去試吓啦! 呢度嘅裝修好有馬拉特色，而且餐廳外面仲有一個So bar,可以食完飯出嚟飲酒Chill吓！食馬拉菜當然要試吓個肉骨茶啦！呢度有好多款唔同嘅肉骨茶包括左一字骨、三層肉、雞腳等等，我哋叫咗個豬腳彎肉骨茶（$58）試吓，呢度嘅肉骨茶以茶壺裝住，如果唔夠仲可以再添，啲肉骨茶好香又有濃郁嘅藥材味，豬腳好淋夠晒真材實料，可以另加辣椒粒或頭抽調味夠哂正！我足足飲咗三碗咁多🤣之後我哋叫咗個高佬麵配雞扒（$72 ），塊雞扒好厚但出奇地嫩滑一啲都唔係鞋，配上炒麵同馬拉辣醬同埋流心蛋，再配上銀魚仔同埋花生好有東南亞風味。另外我哋再叫咗個玻璃魷魚通菜（$68）其實即係水魷魚加上特色辣醬、花生碎配埋通菜味道都幾夾，最後再叫咗一份椰香咖央多士（$35）佢啲咖央有好香椰子味，顏色綠地可能加咗斑蘭味道唔錯！由於我哋仲叫咗一杯凍馬來西亞拉茶（$29）同埋凍冬瓜龍眼茶（$35)有冬瓜條同龍眼肉好清新👍不過飲到成肚水😂所以冇再出去酒吧到飲嘢，呢度唔使收加一幾好，下次可以再嚟試吓其他菜式。