刕舙馫麵館 (已結業)

【#二拾一食記】刀刀刀削削削麵麵麵香港無乜地方食刀削麵，咁啱撞到呢間名都唔曉讀，叫刕舙馫 (音：勵華興）嘅食店，就試試佢。四川麻辣係佢哋嘅主打，成間調味一係四川麻辣，一係唔辣，無得揀。麵係機削嘅，硬係無咗人手嗰種感覺，當然好處係粗幼控制好D。食落算煙韌但我覺得可以再好d. 湯底係牛骨雞骨嗰類嘅清湯，算清甜，唔錯嘅。麻辣就跟配菜上，叫咗牛𦟌，係一粒粒有厚道有𡁻頭嗰隻，口感係好嘅，但食到無乜肉香味，同樣肥牛感覺都係一般般。不過佢個麻辣係好食嘅，麻香惹味開胃，辣道適中，救咗個餸！簡單講，雖然少少貴，但食解吓刀削麵癮，或者鍾意食麻辣嘅，可以一戰。題外話：唔知幫襯時可能新開張，柚面服務勁混亂，不過聽到個負責教人嘅阿姐唔單止無怪D 伙記，仲同佢哋講「唔緊要，慢慢學」，值得一讚！