Chef's Stage Kitchen (愉景新城) (已結業)

星期四放假同舊同事係荃灣行完街，夜晚搵地方食飯。我地想搵間近地鐵站既餐廳，於是去左愉景新城搵野食，最終入左Chef’s Stage Kitchen食。呢間成日都見好多人，所以今次我地好早就去食啦。餐廳環境幾雅緻，座位亦坐得幾舒服，而且服務態度又好。餐牌食物種類繁多，我地叫左一個沙律、兩個主菜同飲品。首先會送上麵包條同餐包，暖暖地又鬆軟。鮮芒果及扒虎蝦肉沙律用上羽衣甘藍，個醬汁調得幾好，芒果夠甜又多汁，蝦都大大隻。初榨純橄欖油蒜香白酒煮紐西蘭海鑽蜆扁意粉味道相當唔錯，蜆好飽滿亦無沙，意粉軟硬適中，用欖欖油黎煮特別滑溜。炭燒美國天然極黑厚切豬鞍扒超級厚切，味道夠入味，而且口感鬆化，好出色。配菜仲有焗薯同蔬菜，好好食。飲品我要菠蘿斑斕葉，前同事要Forest，兩杯個樣都好得。菠蘿斑斕葉比較甜，但斑斕味超出，好有東南亞風味。Forest即係薄荷芒果菠蘿沙冰好大杯，甜度適中，消暑一流。