吞POT 雞煲火鍋.住家菜 (山林道) (已結業)

呢個禮拜突然轉涼，夜晚係街行凍到騰騰震，緊係即刻約fd去打個邊爐先啦🥰就返大家方便係尖沙嘴呢頭搵野食，係openrice見到幾多人like就黎試下。呢間樓上舖黎，唔上網搵都未必識搵到黎呀！一坐低侍應就擺低左醬料架比我地整醬料先，除左平時見果d普通野之外連麻醬呀，沙茶醬呀果d都有，可以跟返自己喜好整。搞掂就拿拿臨睇下食乜啦！我呢排病病地有d咳，所以叫左個花膠螺片雞煲d雞一上臺已經熟㗎喇！唔洗慢慢等，正！d雞好有雞味呀，個湯底都好濃郁，我專登趁未開始落邊爐料飲左碗😋睇下d花膠幾大舊，真材實料！我打邊爐一定就唔少得響鈴，呢到既響鈴係自家製，即叫即炸㗎！上檯時仲熱辣辣，好正！呢個係必食㗎！另外一個好好味既就係呢個桂花蚌，又爽又鮮味😍蟹籽蝦滑，唔錯㗎，記住撈埋d蟹籽同蝦滑先落煲😂我落左兩舊先記得一個好既湯底已經令成個邊爐都好美好😇一定有下次呀，今次因病食唔到辣雞煲，下次一定要試試佢！