URBAN Cafe (駱駝漆大廈第一座)

營業中

休息中

Urban cafe未易名前已經係我好鍾意嘅一間貓cafe，前幾年佢揀駱駝漆做佢新分店真係好驚喜，真係返工放lunch都可以上去睇貓貓。晚市黎講我多數會叫個兩人set，選擇都多。飲品就可能要加錢跟餐。沙律係罐頭菠蘿同生菜，普通嘅沙律，不過酸酸地開胃。是日餐湯係蘑菇湯，幾濃郁，有驚喜！滋味小食拼盤有薯條，雞塊同魚寶。雖然估係冰鮮食物，但佢炸得幾熱幾脆，只係雞/魚肉味唔突出。薯條加上味粉後反而係三樣入面最有特色。據說今日係national pizza day，咁就叫一個Pizza啦。賣相真係幾靚，餅底夠薄，而且芝士都多且偏淡味，令到巴馬火腿個咸味成為主角。不過整體而言都係唔太夠濃味，可能最近口味重咗。Risotto個份量大到不似預期，裡面加咗好多菜同椒，所以口感爽脆，不過缺點係兩種食材個味都好搶，唔太食得出野菌同芝士…桃膠加乳酪唔太甜，可以試一次。飲品黎講牛奶朱古力好香濃，叫佢就唔會伏。香橙梳打都唔差，不過飲到最後會冇味，係呢度凍飲嘅通病。雖然呢餐有啲貴，不過黎到當然係為貓貓，而且其實食物質素算係動物cafe入面中上水平。員工似乎好錫貓貓，所以一直都放心再幫襯。