陳漢記 (已結業)

嘆完群記後，就順步轉個街口嚟呢度。睇見門口貼咗好多有關煲仔飯嘅食評，諗住叫個食吓，點知原來要過咗六點先叫得，於是就叫碗蠔豉花蟹粥，另加一碟豬潤牛肉腸。粥底係我近來食過水準最高嘅 --- 夠綿夠滑，啖落有陣陣米香，食到落碗底D粥都仲幾綿；花蟹比平時食開嘅較大隻，相當好肉地，有D仲食到有糕添，一碗粥入面有三隻大爪加一隻蟹蓋，份量十足；蠔豉切成粒粒，好香好惹味，為個粥底生色不少。總體嚟講係冇得頂嘅，自己覺得呢度水準比上環生記、灣仔李景及靠得住靚粥更出色...腸粉亦係超水準之作--- 皮薄，薄到連入面D餡都睇得清清楚楚，簡直可以用"晶瑩通透"去形容，係明符其實嘅布拉腸粉；豉油調得微甜，不太鹹，味道啱啱好；豬潤好新鮮爽口；更令人讚嘆係D牛肉望落去紅噹噹，以為未熟，實情食落去係啱啱好，鮮甜得有D過份....完美嘅一餐，好感動...好"滿粥"..^_^..向各位誠意推介(絕對唔係賣緊廣告)..