地址：尖沙咀彌敦道132號美麗華廣場1期地庫1樓B142號舖
原來美麗華廣場地庫1樓呢間HABITŪ table已經扎根咗10幾年，望住附近啲店舖不停結業再開新鋪，堅持咗咁多年真係一啲都唔容易🙏，不過近年飲食業真喺好難經營，尤其多咗人返內地消費，餐廳都絞盡腦汁想吸引返多啲客流，所以近排出咗個新Menu，
全部咖啡同人氣熱賣菜式都減咗價〽️，抵食咗之餘最重要唔減質量，性價比即刻高咗唔少🤑
餐廳夠大，劃分咗好幾個area，無論普通餐枱，舒服啲嘅卡位，定只喺想飲杯咖啡坐對住商場嘅咖啡位，都相信總有一個位啱你坐😌，加上木系裝飾同柔和嘅燈光💡，喺度食嘢傾偈認真幾舒服👍
✝️素菜全日早餐 $138
呢個All Day Breakfast夠晒好豐富，加上全素食啱晒想食得健康/唔想太heavy/食素嘅朋友：烤南瓜加咗肉桂粉，香甜得嚟帶有肉桂香；
牛油果簡單用黑椒同鹽調味🥑，保留咗天然creamy口感；烤蕃茄🍅、意大利黑醋沙律🥗、大啡菇都好新鮮；炒滑蛋夠嫩，唔會太乾；烤酸種麵包外脆內軟，配埋玫瑰果醬帶微甜花香🌹，好有驚喜，搞到我忍唔住加多一份嚟食(+$18)，最後仲有青提子，清新解膩
✝️意大利煙腩肉忌廉意粉 $138
呢個意粉一上枱已經聞到好香😍，煙腩肉煎得鹹香夠脆，仲有濃郁微稠嘅忌廉汁，
掛汁力強但唔會過份油膩，意粉煮得啱啱好，彈牙有咬口，加上份量夠多一定夠飽
甜品喺唔少人過嚟HABITŪ都會叫嘅🍰，窩夫、Pancake、Apple tart等款式都算多，
先喺甜品櫃揀咗特濃朱古力蛋糕($58)，朱古力控必試🍫，濃郁得嚟唔會死甜，口感微濕潤厚實，配埋咖啡一流👏；
另外揀咗經典紐約芝士蛋糕($58)，陣陣微香嘅芝士味，質地滑溜唔鬆散，仲有底部鬆脆嘅餅底，最重要唔會太heavy，食完唔會有罪惡感😆
飲品叫咗杯Caffè Mocha($50)同Cappuccino($42)，前者朱古力味香濃，唔會太甜溜，咖啡味都夠突出，平衡得好好；
後者奶泡綿密，拉花夠靚，飲落順滑，唔同季節HABITŪ都會用返唔同嘅咖啡豆，就算Decaf都有得揀🤩
