味千拉麵 (愉景新城) (已結業)

由細到大一直都好鍾意食味千拉麵，細個覺得係慶祝或者考得好先可以食。到而家大個，可以自己幾時食都得，不過都好耐冇食過啦，一於今日去食下先。唔講唔知，原來味千拉麵已經50年啦。細個嗰陣仲以為係新開嘅添，今日嚟到荃灣呢間，原來都仲有好多客喎。我就叫咗個豚肉拉麵，印象中味千拉麵係細細碗咁嘅，估唔到而家大碗左咁多，同其他拉麵店差唔多。一飲個湯底就有好懷念嘅感覺啦，估唔到咁多年來佢嘅湯底都冇乜變，濃得來有佢特別嘅味道，令我忍唔住飲多幾啖呀。不過我覺得最抵讚嘅係呢個炸雞，以前食拉麵好少食炸雞，本身都冇咩期望，估佢唔到咁好食。佢個雞炸外脆內嫩，熱辣辣一咬落去竟然仲有肉汁，好似仲好食過出面專食炸雞嘅舖頭啊。今日先知原來味千拉麵唔單止仲保留住以前嘅味道，而且仲進步咗好多，好似多咗好多唔同款嘅嘢食咁，以後都要多啲嚟先得喇。