Plato Cafe & Bistro (吳松街)

搭完高鐵返到嚟，諗住揀啲西式嘢食吓，見到呢一間比較夜收工，喺高鐵站行大概10分鐘就到，就一於試吓。雖然有訂枱，但係都等咗個零字到先入座。侍應見我哋多行李都特登俾個大啲嘅位我哋放。服侍都幾周到。我哋當日揀咗卡邦尼意粉、兩款意大利飯同佢哋嘅菠蘿牛肉漢堡。價錢反映食材質素，卡邦尼意粉用嘅煙肉係普通嘅煙肉，唔係guanciale，就係爭緊啲鹹香。好彩廚師技術可以搭救，意大利粉軟硬適中。而飯我哋揀咗黑松露帶子意大利飯同埋西班牙海鮮飯。都係嗰句價錢反映食材質素，並冇原粒帶子，而係一粒帶子切開咗三四份，碎上。我寧願你原粒帶子放上嚟都好過碎上扮好多。好彩廚師嘅技術亦都成功拯救到我對佢嘅期望，意大利飯軟硬適中，唔會太腍、太水。 齋講意大利飯嘅話算係中上水平，但配料方面要諗下。個菠蘿牛肉漢堡配薯條幾有新意，食落菠蘿嘅酸味好襯嗰個充滿肉汁嘅漢堡，令到成個漢堡冇咁膩，食晒成個漢堡仲有胃口食甜品🤣🤣。甜品方面，我哋挨咗朱古力心太軟配雪糕，同埋開心果Tiramisu。雪糕質素有待提升其他都不過不失。