禾彩日本料理

營業中

休息中

為咗逃離黃竹坑呢個美食沙漠，小弟決定闖去香港仔，今次就去咗一間聽聞都多人等位嘅日本料理「禾彩」食午餐。午市套餐，初初睇價錢牌係覺得略貴，反而咁樣令我更加想試下究竟食物係咪值呢個價錢，於是我就叫咗份鰻魚蛋飯，套餐包咗一份小食，而我就叫咗螺肉，總共盛惠$88。螺肉一上枱，我同朋友都嘩咗一聲，因為好大份，一啲都唔似普通日本餐廳前菜俾幾件你就算，食落味道幾好！而朋友嘅前菜就嗌咗三式刺身，有三文魚、帶子同甜蝦各兩件，份量都大件而且望落係新鮮，真心抵讚！到咗我嘅主菜鰻魚蛋飯，鰻魚上枱時仲見到表面係起泡，證明真係啱啱燒起！鰻魚汁夠香，蛋配洋蔥夠滑，鰻魚亦夠鮮，米就應該係採用日本珍珠米，粒粒鮮明，唯一要彈嘅係條鰻魚尾燶咗少少！整體嚟講，$88係值得我去俾，總好過我俾$50去食一個劣質飯。