小皇府 (惠安苑) (已結業)

住喺呢度附近嘅朋友同我講話過呢度性價比唔錯。 今日就即興同老公兩個人過嚟飲茶， 大約一點半嚟到，都好彩仲有位。打開張點心紙，見到啲價錢都幾適中，坐落覺得環境幾舒服，夠光猛 ，幾好坐 ，果時坐滿9成人都唔會好嘈。 叫咗桂花烏龍茶， 個侍應提醒我$ 22 但係可免兩位基本茶錢(即係普洱丶香片果D)，都 ok吖。可能係小食唔使煮，所以爽脆蓮莖好快上枱 ，原來食落有少少麻辣，呢樣嘢都真係幾醒胃！叉燒腸粉，皮薄餡多，豉油又唔會好鹹。手撕鷄春卷， 個餡除咗有雞絲之外仲有紅蘿蔔同木耳絲！ 炸嘢都係多油咗啲，無辦法，係要食下脆口嘢嘅🤭之後4款蒸點心一齊上枱，熱辣辣～ 蝦餃夠大隻丶蝦肉飽滿，燒賣ok，蒸粉果又有好多餡，鮮茄上湯鮮竹卷味道都ok。可能今朝冇食早餐，未夠飽，叫咗個叉燒拼豉油雞，叉燒好夠淋，唔會太甜唔會太鹹，味道啱啱好，豉油雞D肉都幾滑，幾有水準。最後食個熊仔綠豆包，人手造就好難個個樣一模一樣啩～ 雖然話係甜品但唔係太甜😊整體都算唔錯，朋友果然冇介紹錯！ 去過洗手間，都好乾淨企理。希望可以保持水準，下次再幫襯過。