水門雞飯 (汀角路) (已結業)

以前一直嚟嘅時候都係散叫，但係自從上次見到佢有套餐食之後，我就嚟食套餐。喺呢度叫套餐，可以揀兩款主食加兩個小食同埋兩杯飲品。飲品方面我叫咗杯龍眼冰，食泰國嘢由於比較熱氣，所以我一般都會叫一杯龍眼冰來下火，但係要注意嘅係，如果唔飲得太甜嘅朋友，可能會覺得會好甜，建議飲嘅時候可以叫職員加多少少冰。特別嘅地方係，佢呢度亦都可以叫一杯雪梨水，同樣都係清熱下火。我哋第一個叫咗係香辣炒肉碎飯，呢一款飯，佢嘅肉碎，應該係同生菜包嗰啲肉碎差唔多，都係偏少少肥，而且亦都偏辣，，面頭加咗一隻熟嘅雞蛋，整開嘅時候，啲蛋汁係會流晒出嚟，都算係幾唔錯。泰式撈金邊粉都係一般會點嘅菜，佢呢度嘅金邊粉，白色嘅係，有三隻好大隻嘅大蝦喺上面，係爽口嘅，整體食落去嘅時候感覺味道亦都偏重。之後我哋叫咗個馬拉盞肉醬芥蘭苗，始終都係小食，所以份量唔算太大份，芥蘭翠綠偏硬身，肉醬味道不算太濃。之後甜品方面，我哋自己另外加錢叫咗芒果糯米飯，佢嘅糯米飯有非常多非常多嘅椰漿喺上面，非常惹味，芒果亦都可能浸過糖水，唔酸，少少甜。