吉列牛忌廉烏冬專門店 (百樂中心) (已結業)

抗疫疲勞，銅鑼灣明顯多返人，今日午餐去左好耐冇黎嘅吉列牛忌廉烏冬專門店食返餐，都有幾多食客。落單用QR code。餐牌分幾大類，有主食，套餐，釜飯，涮涮鍋，小食同飲品。今日例牌叫左一個套餐，已經包左兩款招牌菜同兩支汽水，另外再叫左一份小食。套餐係吉列牛定食 + 咖哩忌廉烏冬（小辣）+ 2汽水，價錢$256另加一。吉列牛定食 吉列牛係來自韓國嘅菜式，絕對係必食之選。牛肉係美國牛裡脊肉，上枱時已經係3成熟，可以每邊燒2秒至半熟，或者等你自己喺個爐仔上面烤到自己鍾意嘅熟度先入口。外皮香脆而入面嘅牛肉就明顯見到中間係生肉嘅深紅色，外圍就係粉紅色。牛肉燒熟啲都唔會韌，肉質唔錯。跟吉列牛有蒜味沙律醬同甜酸燒肉汁等你點，仲有wasabi，個人最鍾意蒜味沙律醬，因爲令到塊牛更香滑。伴碟有少量胡麻醬梛菜絲沙律。定食包兩款前菜，分別係一粒車厘茄切開兩半加左胡麻醬同一細磚加左胡麻醬嘅豆腐。仲跟一碗白飯，上面撒滿飯素，同一碗味噌湯。咖哩忌廉烏冬招牌咖哩忌廉烏冬係另一必食之選，第二度真係唔覺有得食呢個菜式。大碗烏冬上面滿佈白色忌廉同少少蔥花。忌廉同咖哩香加埋原來好滑又唔太膩，味道其實係日式咖哩既甜甜地，好好食。