T.Co (開源道)

營業中

休息中

自從大半年前食過呢間烤卷之後，每次經過呢度都心思思，最近就真係走去再食返次。今次嚟到發現多咗好多人客，所以我哋都等咗一段時間先可以落單，但食完就覺得真係值得等。雞肉烤捲呢個烤捲保留到上次水準，雞肉烤得唔會太韌亦唔會好油，餅身都好夠薄。配料都係有番茄、青瓜、洋蔥；三種顏色嘅汁令個餡料味道豐富左。香嫩雞肉飯(大)呢個雞肉飯都依舊係好大碗，米飯橙橙黃黃好煙韌，蔬菜配料同埋三種醬汁都同雞肉烤捲一樣。今次我發現呢個飯嘅辣味似乎係來自啲雞肉，佢辣辣地幾得黎好惹味，真係值得一試。我哋仲另外叫咗個薯條，佢炸得幾香脆，絕對唔比麥當勞差。而且份量都算幾多下，我哋兩個女仔share都唔係太食得晒。飲品方面佢哋比大半年前多咗選擇，我哋今次冇叫咖啡，叫咗一支有氣檸檬茶同埋一包普通檸檬茶，食完咁多嘢飲返支真係感覺好爽。