影片
更多
2023-08-12
1117 瀏覽
兩碗麵，一碗雙併粗麵，一碗三併幼麵，都係嚟自同一間食店，價錢都係一樣，你會點揀？當然，你可以take both，但前題係你要食得落兩碗至得，或者好似我咁，分開兩日嚟試。警告：以下內容超長，慎入！話說上個月起社交平台唔只一次見過呢間標榜新鮮騸牯牛做食材嘅小店介紹，咁啱我每星期都有兩日出旺角，既然一場嚟到，時間又許可，無理由唔試埋先至走；又既然上次試過佢嘅筋腩麵，味道唔算太差，咁無理由唔試多啲佢哋其他嘅美食，話唔定會搵到好美味嘅嘢食，好啱心水嘅美食呢！結果，皇天不負有心人，真係畀我試到好美味嘅食物，係邊樣食物咁好食？請繼續細心閱讀落去，自然會見到答案。吸取第一次要在酷熱天氣下，起門口排隊超過半個鐘先至有得食嘅經驗，我唔再起佢12點半，開門無幾耐就排隊，而改起下午1點半後鐘先至到，心諗飯市時段都過咗大半啦，無理由仲咁多人卦？但結果大失所望，一樣咁多人，一樣要排超過15分鐘，接近半個鐘，好彩我唔趕時間，咁當然要排啦！終於到我可以入去啦！一坐低，我未開口，個店員已經同我講話崩沙腩同爽腩已經賣哂，我同佢講：得得得，我唔係叫呢啲，我要碗牛脷麵加粉腸（講真，出面麵店，我就見唔到有牛脷同粉腸啦，唔知各位
警告：以下內容超長，慎入！
話說上個月起社交平台唔只一次見過呢間標榜新鮮騸牯牛做食材嘅小店介紹，咁啱我每星期都有兩日出旺角，既然一場嚟到，時間又許可，無理由唔試埋先至走；又既然上次試過佢嘅筋腩麵，味道唔算太差，咁無理由唔試多啲佢哋其他嘅美食，話唔定會搵到好美味嘅嘢食，好啱心水嘅美食呢！結果，皇天不負有心人，真係畀我試到好美味嘅食物，係邊樣食物咁好食？請繼續細心閱讀落去，自然會見到答案。
吸取第一次要在酷熱天氣下，起門口排隊超過半個鐘先至有得食嘅經驗，我唔再起佢12點半，開門無幾耐就排隊，而改起下午1點半後鐘先至到，心諗飯市時段都過咗大半啦，無理由仲咁多人卦？但結果大失所望，一樣咁多人，一樣要排超過15分鐘，接近半個鐘，好彩我唔趕時間，咁當然要排啦！
終於到我可以入去啦！一坐低，我未開口，個店員已經同我講話崩沙腩同爽腩已經賣哂，我同佢講：得得得，我唔係叫呢啲，我要碗牛脷麵加粉腸（講真，出面麵店，我就見唔到有牛脷同粉腸啦，唔知各位有無見過呢？），佢同我講麵得返粗麵，無幼麵，我心諗：唔係卦，都未夠兩點，幼麵咁快賣哂？咁無計啦！粗麵都好過無。
隔咗幾分鐘，碗麵終於嚟到，美食當前，當然一啖咬落牛脷度啦！嘩！不得之了，我感覺好似電影食神裡面嘅薛家燕食到碗叉燒飯咁，身體會發光，頭上多咗個光環咁😇，無錯！係牛脷，終於畀我搵到你啦！肉質細嫩，腍得嚟帶有鮮味，唔通呢啲就係新鮮貨同雪藏貨嘅分別？而且份量亦唔少，以咁嘅質素，$60一碗，絕對值得。
粉腸食落有啲失望，雖然望落賣相唔錯，但可能我對粉腸有特別要求：好食嘅粉腸要腍得嚟有啲咬口，有些少煙韌，腸壁唔可以過薄，無苦味得嚟要食到些少粉腸嘅甘香，而呢幾段嘅粉腸，夠哂腍，但因為咁而唔我煙韌，雖然無苦味，但就無咗甘香，以我嘅標準係過熟，味道不過不失，唔食無損失。
粗麵同上次食嘅幼麵一樣，無鹼水味，好彈牙，好爽，但正如我上一篇關於呢間食店嘅評論所講，幼麵更能索到湯湯汁，懂得食湯麵嘅人，首先會從個湯入手，因為個湯先至係靈魂，麵係軀殼，食材係五臟六腑。雖然呢間麵店嘅湯偏鹹，但起碼食唔到有味精，唔會食完要狂飲水。
至於另一碗麵，牛肚麵加墨魚丸，再加牛膀。前兩樣都係餐牌固定食材，但牛膀就不定期供應，餐牌上係無，我頭兩次去都無，今次係老闆娘話加$12有牛膀，問我試唔試，咁一場嚟到，又未食過，一於去馬。
同樣地，呢次又係缺食材，但今次無嘅係牛爽腩，可能因為咁，所以無好似上次咁，一坐低就講無乜無物，係等有人叫爽腩，先至話無。
碗麵隔咗一陣嚟到，牛肚係金錢肚，而唔係毛肚，而我個人亦比較喜歡食金錢肚，份量都幾多，燜得好腍，但我自己則比較喜歡食爽口嘅金錢肚，但$48有咁多件，若果真係新鮮貨色嘅話，絕對抵食（抱歉，我食唔出鮮味，感覺質地似雪貨）。
$12有三粒墨魚丸，不過不失，無驚喜，亦唔會太差，質素算係可以接受。
$12有5件牛膀咁多，絕對係抵食，需知道依家啲牛雜好貴，一串牛雜至少要$12，份量絕對無呢5件咁多。
而起我進食期間，聽到有人要外賣，而且指定要爽腩，得知無爽腩嘅時候，顯得非常失望，話爽腩非常好食。佢呢番話引起我興趣，雖然話要$82一碗咁貴啫，但如果係好食嘅話，都值得嘅。
咁到底起呢間食嘢要講彩數，唔係樣樣嘢都齊，得14個背靠背座位嘅小食店，我最終食唔食到牛爽腩呢？若果食到，味道又如何呢？請等待下篇貼文，到時再同各位介紹。
牛肚牛膀墨魚丸麵
$72
19 瀏覽
0 讚好
0 留言
牛脷粉腸粗麵
$72
17 瀏覽
1 讚好
0 留言
張貼
