坐到埋去見到個電磁爐就已經覺得好奇怪，職員話係因為全部爐都壞晒得返窗邊嘅某啲爐係用得，我哋同事問緊點解唔可以轉窗邊嘅俾我哋？
個場得另一台客，晚市時間，直到我哋食完都冇其他人加入，咁樣都寧願俾啲壞爐嘅枱我地？
而且我哋係有提早book位。
呢樣都算，真正焫着我哋嘅係啲食物質素。
首先前菜～
服務重點：我哋開聲先有。
綠色嗰碟菠菜，冇麻油香冇味。
芽菜，冇味。
泡蘿蔔，勁酸。
泡菜，酸到覺得有藥水味，好似係開咗個泡菜唔記得食擺雪櫃勁耐然後發酵到極點。
我哋嗌咗個牛拼盤。
左邊嗰幾嚿有啲雪花嘅牛係正常嘅，其他嘅全部用大牙都咬唔開，冇肉味。
右邊灰色嗰啲肉上面白色一pat pat嘅，店員話係醃料⋯⋯真係令我好懷疑以前食過烤肉嘅經驗。
服務重點：開兩個爐，但係比一支鉗。
個鐵板傳熱好有問題，烤肉可以冇吱吱聲，已經將個火開到最大(如圖)。
其實見到佢份牛肉大家已經有啲心慌慌，然後想取消個醬油蟹，然後職員話廚房已經切緊。
醬油蟹嘅評價一致認為鹹，超級鹹，比海水更加鹹，撈飯都唔掂。
炸物拼盤，我覺得係最正常。
炸雞有啲肉汁，不過KFC同Jolibee會好食啲。
個炸皮唔係油香味，有啲厚，唔均勻。
食緊嘅時候，職員話泡菜煎餅煎燶咗⋯⋯我即刻話咁取消啦不如。但細思極恐，一間開門做生意嘅餐廳，竟然可以煎燶，然後搵個職員出嚟同個客講⋯⋯？ 我以為一般嘅做法係即刻再煎塊靚嘅⋯⋯定係佢成間舖頭已經冇煎餅？
1
我都知我哋係自己衰仔，明明OpenRice已經有三個差評都預約，見到個Gas爐就應該要掉頭走，竟然仲坐低落單，應該純粹係因為聚會嘅氣氛好好，所以冇理性咁思考。
1
睇埋張單⋯⋯
呢個價錢，真係唔應該要受罪。
