聽住荃灣既friend 私心推介，呢間車仔麵幾好食，又入味同多選擇 。搵日收工去食個dinner。
1碗豬大腸、砂薑豬肚、豬皮油麵🍜
呢碗配搭好邪惡，豬大腸無腥味又軟腍，入晒味；砂薑豬肚腍中帶嚼勁，但又唔難咬；豬皮厚身一樣軟腍，完全吸晒啲湯汁同辣汁，食落好過癮。油麵煮得啱啱好淋得嚟仲算有口感 。成碗麵同餸份量好足夠，湯底真材實料不加味精每日熬製同個辣醬都好出色 。
1碗蘿蔔、陳皮魚蛋、牛筋蘭州拉麵🍜
呢一碗嘅蘿蔔爽甜多汁，very juicy炆得岩岩好，唔會散晒亦無渣。陳皮魚蛋彈牙帶少少陳皮香，絕對越嚟越少地方食到。牛筋絕對係亮點，炆到腍滑入味，啃落骨膠原滿滿。
另外再叫左兩款小食，分別係沙嗲牛柏葉同脆炸墨魚餅🦑
～沙嗲牛柏葉～
呢款沙嗲牛柏葉真心入味，沙嗲汁夠香濃，配合牛柏葉爽口彈牙，完全吸晒汁，啖啖都係沙嗲精華，滿足感十足！
～脆炸墨魚餅～
炸到金黃脆卜卜，外層好香口，包咗層腐竹喺面，咬開到入面先係墨魚餡，點埋個甜辣醬，鹹香微辣香口好惹味，啱晒做開胃小食。每件份量啱啱好，幾有驚喜！
呢間銘陽車仔麵食材新鮮，麵餸份量足夠，又不加味精，湯底仲精心熬製 。可惜我唔係住荃灣，咪日日都去食，係值得再幫襯嘅地道小店！
