原來餐廳喺11月初開始做緊新加坡主題嘅自助餐，一系列地道新加坡美食包括：星洲海南雞飯、沙嗲串、肉骨茶、叻沙、胡椒蝦、炒貴刁、福建蝦湯麵⋯⋯ 我哋當中有個新加坡同事，佢食過之後，話呢度嘅食物質素好高，令佢食到家鄉嘅味道，全部口味都好正宗。
呢個海南雞飯，雞上髀肉嫩香滑，油飯混合醬汁真係好惹味。
呢個胡椒蝦絕對驚喜，粒粒黑胡椒爆鮮蝦，隻隻都好香脆入味，我連殼都吞埋。
炒貴刁又係必食，唔會太油膩但好夠鑊氣。
當然唔可以錯過呢碗椰香十足嘅叻沙，魚蛋同蝦都好彈牙。
仲有呢個正宗新加坡沙律 —— 加多加多。
當然唔少得一系列嘅海鮮同刺身選擇。
另外，仲有經典星洲小食及甜品則包咖央多士、招牌班蘭蛋糕、雞蛋仔、冬陰功撻、香茅蛋糕、仲有嚤嚤渣渣。
呢個新家坡主題會做到2021年2月，宜家網上預訂仲有七折優惠添！
