御滿屋日本料理

營業中

休息中

御滿屋係一間位於荃灣大鴻輝嘅放題餐廳，我冇嚟食好耐啦，但佢嘅質素仲係好唔錯。食放題當然要試吓佢嘅刺身先，呢度嘅種類好多，全部都好新鮮。三文魚、油甘魚同帶子等等都好鮮甜。另外壽司嘅種類都好多，卷物都好有創意，例如蟹肉沙律忌廉芝士軟殼蟹卷同龍蝦三色塔，口感好豐富。其他火炙壽司都好香口，例如特濃芝士醬燒皇帝蟹棒壽司同鹽燒左口魚邊壽司。小食方面，我哋叫咗御泰之味冷鮑魚，鮑魚好爽口，而佢嘅泰式醬又酸又辣，好開胃。熟食方面，我哋叫咗蒜蓉焗生蠔，大隻又新鮮。仲有啲熱辣辣嘅卜卜蜆。我最鍾意嘅就係佢嘅貓山王榴槤炸波波，熱辣辣入面仲有流心，好香榴槤味。甜品方面，雪櫃入面有好多選擇，一定可以搵到自己鍾意嘅雪糕或蛋糕。飲品方面，除咗支裝罐裝飲品，佢仲有自家調配嘅特飲。例如有紫背天葵白桃同蝶豆花白桃，打卡一流，味道唔會太甜。酒類方面，可以揀凍嘅清酒同梅酒，有時仲有熱清酒。