李圓圓 (寶安大廈) (已結業)

前晚嘅晚餐係喺旺角掃街買takeaway翻屋企食，買左好多串燒同街頭小食。買咁多鹹嘅野食，就覺得一定要買返杯甜野，就同朋友一人買左一杯李圓圓啦。黑糖珍珠鮮奶2.0 $33買嗰陣啱啱好有一批新嘅黑糖珍珠炒好，所以拎上手杯黑糖珍珠鮮奶2.0個底啲黑糖珍珠仲係新鮮滾熱辣嘅，令人食指大動。一路拎返屋企嗰陣一路都仲摸到個杯底係暖笠笠嘅。暖暖嘅黑糖珍珠配上冰凍嘅鮮奶，味道微甜，奶味濃郁，口感濃厚豐富。珍珠咬落去煙韌彈牙，令人回味無窮。食住鹹味嘅食物飲呢杯飲品好正，細味品嚐嘅話，仲好似食緊一碗甜品咁。平時都幾鍾意飲黑糖珍珠鮮奶，李圓圓嘅呢杯黑糖珍珠鮮奶2.0應該係我飲過嘅同類型飲品入面最啱我口味嘅，微甜而又奶味十足，令人想一飲再飲。