新沙洞澡堂 (已結業)

深水埗就多餐廳，但係長沙灣就比較少，朋友喺長沙灣放工就喺附近，所以就嚟到呢一間韓國餐廳。入面嘅裝修分為兩部份，一部份係扮沖涼浴室，另一邊就以燒酒裝飾為主題。一入到去都幾full House，接踵而來都有好多客人未book枱就摸門釘。餐廳係自助形式，掃QR code去點餐，非常方便！我同朋友不約而同都好鍾意食豬手，而佢有一隻重口味嘅蜜糖蒜蓉豬手更加係令我哋急不及待想叫嘅嘢食。果然蒜蓉加埋豬手真係好夾，比起普通豬手更加新穎又好味。另外我哋亦都叫咗鐵板毛豬。黑毛豬需要自己燒製及切開。黑毛豬嘅豬肉味好香濃，肉質就比較實啲，可能係因為我哋怕豬肉未熟燒耐咗少少。整體嚟講如果想食BBQ又唔夠多人一齊食嘅話，呢一個小黑毛豬的確係幾值得叫！最後梗係要叫埋甜品先至夠圓滿啦。我地order 嘅係而家非常流行嘅croffle，加埋燒布甸喺面頭，係一樣非常邪惡嘅甜品。朋友剛好生日，用來做生日蛋糕，兩個人去食就啱晒啦。