川味香

營業中

休息中

今晚屋企煮飯，所以諗住外賣加餸，所以嚟到位於紅磡嘅一間川味串燒店外賣。因為即叫即燒，所以等嘅時間都唔少，我大概等咗20-25分鐘就有得攞嘢食喇。蒜蓉燒原條茄子（$30）- 繼蒜蓉配粉絲外，蒜蓉配茄子都係我嘅最愛。一打開盒已經聞到好香嘅蒜味，茄子燒到好淋，入晒啲蒜香味，一定要試。烤五花腩豬肉串（$20/3串）- 呢個幾掋食，價錢平，一份已經有三串咁多。除咗豬肉質感有啲硬外，個味道真係好入味。鹽燒白鱔魚（$42）- 我同我老豆都好鐘意食鱔，所以見到一定要嗌。一份有三小舊，我哋一家三口食啱啱口。個鱔口感鬆脆，肉質保持到嫩滑多汁，一啲都唔dry，啖啖肉好好味。