狐狸食堂

營業中

休息中

之前整咗手作想俾朋友做禮物，今晚就約咗佢出嚟狐狸食堂俾驚喜佢喇。餐廳外觀同內部裝修都行日式風格。木系裝修令人好舒服。四支免治雞肉棒：包括明太子味，檸檬味，芝士味同醬燒味。一向鍾意食芝士嘅我梗係覺得芝士味最好食啦！雞肉棒多汁兼啖啖肉。質地軟熟。五花腩set ：包括煙肉蕃茄卷，蘋果肉桂芝士卷，野菜豬腩卷同埋醬燒年糕豬腩卷。估唔到呢個set有驚喜。佢每一個卷嘅配搭都好新穎。尤其喜歡佢個蘋果肉桂芝士卷，玉桂味唔會太甜，但佢嘅香味同蘋果同埋豬肉都好夾。另外佢椰菜豬腩卷賣相都好靚，豬肉捲着翠綠色嘅菜，賣相不錯。燒厚切牛舌：牛舌冇根，易咬開，好有油香。日本燒蠔：好鮮味。生熟度到啱啱好。唔會好細隻。明太子玉子燒：明太子嘅鹹香味配雞蛋好夾。雞蛋煮得嫩滑。醬油燒白鱔：呢個大推！白鱔厚身。好新鮮同彈牙。燒度啱啱熟。狐狸炒雜菌：雜菌好香，有返咁上下厚度有咬口，好清甜。果肉白桃汁：真係有粒粒白桃果肉喺入邊㗎。配搭串燒一流。總括嚟講，佢各款嘅食物質素都幾好。地方靜靜地又坐得舒服。好適合同朋友一齊嚟聚餐。