丼瀛 (已結業)

叫咗個藍旗吞拿魚海膽丼，係屬於主廚介紹嘅菜式，二百幾蚊一碗我滿心期待，仲擔心食唔晒，上菜後發現啲吞拿魚質素好一般，吞拿魚魚腩蓉口感唔覺得係肥腩，魚脂油香欠奉，吞拿魚亦未完全解凍入口冰冷有雪。menu幅相睇到嘅大大塊馬糞海膽同真係上菜嘅細塊海膽完全兩碼子嘅事，半熟蛋亦變咗日式蛋餅，真係俾幅相呃左。最後因為食晒啲餸仲有飯剩(可想而知啲餸少得幾淒涼)，所以我加多左個燒白鱔，事後加燒物預咗要等，但因為係特別介紹我都有啲期望，好可惜等左一段時間先嚟咗好細塊串燒（兩舊夾埋得我個手指公咁大），雖然新鮮熱辣味道可以，但覺得性價比好低。一個人埋單三百幾蚊，廟街呢個位置呢個質素完全唔值，作為老街坊我可以話附近嘅七福和食亭,Sen88甚至新開嘅Hibiki雖然唔係主打魚生，但佢哋嘅魚生菜式，質素份量性價比都好佢好多,唔知點解呢間野咁多好評。食完本來想用the club 儲積分，工作人員又搵唔到部機，令整件事情掃興再加掃興。服務態度其實不錯，仲好殷勤幫你打燈影相，事後諗返懷疑係要咁先令到食物賣相好啲。食到燒白鱔其實我已經完全冇心情影相。（OpenRice 唔知點解upload唔到幅相）