大丸ラーメン

營業中

休息中

呢間餐廳人氣爆燈，最深印象係疫情禁堂食果排，都可以有勁長龍條隊等買外賣。本身想試貝丸，可惜是日售罄。蝦丸粗麵 $98賣相好靚，勁多櫻花蝦勁震憾。啖湯好香濃，充滿住櫻花蝦味。塊叉燒比普通嘅日本叉燒好食，薄身成4 - 5 塊， 大塊嘅，我加埋枱面上嘅蒜泥食，即刻變埋蒜泥白肉咁，仲好食！另係隻溏心蛋，比普通嘅深色，好有蛋香同好滑。另外，將麵條同木耳絲一齊食，提升埋個口感，加上麵條掛埋啖啖湯汁，完美。餐廳好貼心咁預備埋昆布醋，可以溝落d湯到，等你飲埋d湯，因為餐廳主打無味精架！辛丸幼麵 $88叫咗中辣，味道啱啱好。湯底係豬骨湯底，好香濃，味道其實似出前一丁豬骨味，不過再次強調返，佢係無味精但做到出前一丁效果喎！原味餃子 （山椒及餃子汁）$35五隻餃子一上枱痴埋，但你食一舊又唔會好難撕開喎。想講佢連係餃子皮都好食！表面煎到金黃色，食落去成塊薯片咁，有埋肉汁味，勁香口。佢唔算多饀，但做到恰如其分。就算唔係點汁都已經好好食。