小火焰韓式咖啡廳 (金山樓) (已結業)

午餐嚟呢度食飯，都見到有唔少人排隊，我自己就諗住嚟食烏冬，因為見到好多食評都講烏冬好好食。我嚟到呢度等咗10分鐘左右，就有位，睇餐牌，午餐平均係60幾蚊左右。我同朋友都好鍾意嚟呢度食，反覆都食過好多次😃我自己就叫咗個鰻魚燒蕃茄湯烏冬，蕃茄湯底唔會特別鹹，反而有少少酸，都幾開胃。烏冬本身係扁平，質感咬落去會比較細同埋比較滑，就唔會有好厚麵條嘅感覺；鰻魚本身亦都大嚿，濃厚嘅醬汁，令到鰻魚變得特別濃，唯一有一個位係鰻魚比較淋身，如果可以整得香脆就更加好。飲品方面我叫咗杯熱咖啡，咖啡配上曲奇餅，我覺得係幾細心，苦中帶甜的感覺。我朋友另外叫咗個蘑菇雞翼湯烏冬，最鍾意嘅係佢雞翼脹卜卜，裏面藏住嘅係忌廉蘑菇，而且炸得非常熱，好香。飲品叫咗杯凍檸茶，亦都幾大杯。其實我同朋友都好鍾意睇呢間食飯，所以佢同我亦都有寫過食評，呢度每人唔使$100 ，已經食得好豐富，所以我哋都好鍾意成日嚟食。