::: 赤丸新味 ::: $68
論份量, 比起出面d拉麵店細碗少少~ 論配料, 亦只有黑木耳、青蔥同埋兩塊叉燒~ 少咗平時食拉面都會有嘅筍絲、紫菜同雞蛋! 佢嘅豚骨湯底本身唔算好濃, 不過湯頭浮滿一粒粒肥豬膏, 滲出陣陣豬油香. 赤丸新味比普通白丸多加咗味噌醬同埋蒜油, 撈埋入湯裡面令湯底惹味得多~ 麵條無得你揀軟硬度, 係較幼身嘅拉麵, 唔太索湯, 但咬落都煙韌. D叉燒係腩位一層肉一層肥膏嗰隻, 配埋個粒粒肥膏湯確實油膩… 整體係偏細碗, 但係油膩. 味道ok但唔算特別出色.
::: 味噌豚骨拉麵 ::: $58
豬骨湯底加上味噌好似怪怪地, 食得出嗰豬骨湯底又唔係好食得出個味噌… 湯底味道算唔差, 之不過真係油咗d, 變到好滯咁… 叉燒有2塊, 肥肉佔多數, 太肥膩喇. 麵條確實煙韌, 有蛋香, 不過唔太索湯. 整體係平嘅, 不過份量質素都只係普普通通.
::: 半熟蛋 ::: $10
要另加先有嘅半熟蛋, 蛋白已經係實的的嘅全熟狀態, 蛋黃亦頗凝固無乜流心. 蛋味都ok濃嘅但實在有d令人失望…
唔知係咪因為唔係尖沙咀本店, 質素硬係覺得爭d… 無人地講得咁驚為天人. 湯底咁樣浮住d肥膏真係第一次, 係特別, 係有脂香, 不過豬骨湯味又唔係好濃郁~ 如果要等成個鐘先有得食, 我又覺得唔係咁值…
