七喜粥麵小廚

營業中

休息中

同三個朋友一齊去咗七喜食嘢，門口好多人排隊，看來呢間野都幾多人擁戴。首先嚟咗個京都骨，我覺得佢整得非常之好，排骨外面爆到脆脆地，咬落啲肉又幾爽，汁做得好惹味，好開胃，個粥叫做花膠螺片帶子粥，聽個名已經知道好足料，而事實上真係有晒以上嘅項目而且又唔係好孤寒咁得一兩粒，好多餸。個粥好鮮甜好濃滑，個口感好似滑到忌廉湯咁，而且佢仲加左蝦子，一絲不苟。見到個粥加左花生，本來以為食緊軟綿綿嘅粥咬到粒花生會覺得好格格不入，但原來呢個配搭都幾得意，食一啖粥入面有一粒花生，咬碎花生後，佢嘅香味撈埋鮮味嘅粥一個好襯嘅配搭。小炒王，正，夠鑊氣，啲魷魚幾新鮮所以好爽口。個蝦膏蒸腩肉，只能夠話佢好夠味。我個朋友話好咸，咁有蝦膏咸係好正常嘅，但我覺得好似只有咸，爭左啲蝦膏味。已經唔係第一次來七喜食嘢，發現呢度有個特色，就係喺呢度做嘢啲家姐會好落力咁介紹你叫咩餸，有心水佢都會比意見，感覺幾親切㗎。意外發現比較傳統裝修嘅七喜個天花都幾富時代感，兩者間相映成趣。