花貝日本料理 (已結業)

疫情之後冇得去旅行，唯有花啲金錢喺飲飲食食度，平衡返工作上嘅壓力。今日嚟到呢一間位於銅鑼灣嘅日本料理餐廳，格局舒適，座位寬敞。雜錦壽司(8貫）一盤放滿新鮮食材，每件壽司嘅米飯唔會太多，而且飯粒都握得幾實。深海池魚口感比較爽口，冇咩魚腥味。海膽包住爽脆嘅紫菜，入口即溶，啖啖鮮味十足，而白蝦黏度較高，非常清甜，瘦拖羅魚味較出，口感細緻一點，赤貝夠晒新鮮，爽爽彈彈嘅口感深得我嘅喜愛。師傅會把wasabi放進各種壽司之中，更帶出當中嘅鮮口感。另外我呢個食肉獸梗係叫咗黑豚串燒拼盤打個底先，全部都係來自日本嘅黑豚肉，各串都有特色。我最鍾意豚肉包蘆筍，食落口感更見清新，唔會太油膩。另一款包着香菜，面頭上嘅調味都做得非常足夠，入口獨特。至於最肥美嘅五花腩串，油脂滿溢，可以加上檸檬汁添！